13. okt, 2016

Di makt

Du maktar ikkje skapa
eit einaste frø
i den vårlege jord.
Men du kan trakke
på det som gror.

Og du kan knuse gleda
med steintunge harde ord.

Du kan ikkje makte å stille
bladi til ro
på eit blåsande tre.

Men du kan hogge det ned -.

Tankane kan du 'kje styre.
Ingen veit kvar dei kjem i frå.
Men du kan stengje dei inn i deg sjølv,
attom lås og slå.

Du kan ikkje skapa
det minste strå
som skjelv for din skume nærleik.
Avmektig er du.
Men alt kan du gje
din kjærleik.

Jan-Magnus Bruheim, "Ord gjenom larm", 1954